अर्घाखाँची । राष्ट्रिय जनमोर्चाले आगामी प्रतिनिधिसभा निर्वाचनका लागि अर्घाखाँची जिल्लाबाट पशुपति ढकाललाई उम्मेदवार बनाउने निर्णय गरेको छ। पार्टीको केन्द्रीय समितिको निर्णयअनुसार ढकाललाई प्रतिनिधिसभा सदस्यका लागि उम्मेदवार घोषणा गरिएको हो।
लामो समयदेखि वामपन्थी आन्दोलन तथा जनमुखी राजनीतिमा सक्रिय रहँदै आउनुभएका ढकाललाई पार्टीले इमानदार, निष्ठावान र संघर्षशील नेताका रूपमा मूल्यांकन गरेको जनाएको छ। जनताको अधिकार, सामाजिक न्याय, राष्ट्रिय स्वाधीनता र सुशासनका पक्षमा निरन्तर आवाज उठाउँदै आएका कारण उहाँलाई उम्मेदवार बनाइएको पार्टीको भनाइ छ।
पशुपति ढकाल विभिन्न राजनीतिक तथा सामाजिक आन्दोलनमा सक्रिय भूमिका निर्वाह गर्दै जनसमस्यालाई प्राथमिकतामा राखेर संघर्ष गर्दै आउनुभएको नेता हुनुहुन्छ। अर्घाखाँची जिल्लामा शिक्षा, स्वास्थ्य, कृषि, रोजगारी र आधारभूत पूर्वाधारका सवाललाई संसदमा प्रभावकारी रूपमा उठाउने प्रतिबद्धता उहाँले व्यक्त गर्नुभएको छ।
राष्ट्रिय जनमोर्चाले अर्घाखाँची जिल्लाका सम्पूर्ण मतदातालाई पार्टीको नीति, सिद्धान्त र उम्मेदवारको पक्षमा मतदान गर्न अपिल गर्दै ढकाललाई विजयी गराउन सहयोग गर्न आग्रह गरेको छ। पार्टीले आगामी निर्वाचनमार्फत जनताको पक्षमा स्पष्ट र मजबुत आवाज संसदमा पुर्याउने विश्वास व्यक्त गरेको छ।
